Champions League. Real Madrid është përfituesi më i madh

28 Nëntor, 2018 73 Pa Komente

Champions League është kompeticioni më i lakmuar nga klubet europiane, jo vetëm për prestigjin që ka ai, por edhe për të ardhurat financiare të majme që ato përfitojnë.

Këtë e tregojnë shifrat dhe statistikat, siç janë ato shpërblimeve që janë dhënë në 25 vitet e fundit, që nga sezoni 1992-93 kur u vendos edhe formati aktual i këtij turneu.

UEFA ka zbuluar bilancin e të ardhurave të përfituara nga klubet europiane, ku pjesën e luanit e kanë marrë gjithnjë ato që kanë pasur rëndësinë më të madhe në futbollin kontinental.

Shifrat janë vërtet marramendëse, e podiumi plotësohet nga dy gjigantët spanjollë, Real Madrid e Barcelona, si dhe Bayern Munchen, që në total kanë përfituar nga UEFA 2.2 miliardë euro.

Vendin e parë e mban pikërisht skuadra kampione në fuqi e Europës, me 778.2 milionë euro të përfituara në këto 25 vite, e ndjekur nga kampionët e Gjermanisë, Bayern me 743.9 milionë, e më pas Barcelona në vendin e tretë, me 693.6 milionë.

Klasifikimi i fitimeve të klubeve nga shpërblimet e UEFA-s vijon me Juventusin, që është në vendin e katërt, duke lënë pas skuadrat e Premier League, Manchester United, Chelsea dhe Arsenal.

Mbyllin dhjetëshen e skuadrave që kanë përfituar më shumë në 25 vitet e fundit, me pjesëmarrjen e tyre në Champions League, Paris Saint-Germain dhe Roma.